有日有位小姐同位婆婆嚟到診所～
小姐:你呢度係咪有長者優惠？
我:係呀，夠65歲就會平啲～
小姐同婆婆講:阿媽，俾身份證佢呀！
小姐望住我:喂，身份證係咪直接做埋俾錢㗎？
…吓？乜原來得㗎？等我去地産舖show吓id card先！咁就解決哂所有土地問題啦！發達啦！
我:身份證還身份證…睇醫生都係要俾錢嘅，我哋只收現金啊～
小姐:佢張身份證當錢用㗎嘛！
我:你係咪講醫療券呀…
小姐:唔知你講乜券呀，我冇啲乜嘢券喺手㗎！人哋話間間診所都係俾張身份證就可以當錢駛！
我:唔好意思…嗰啲係醫療劵，你要去有「醫療券」貼紙嘅診所先用得㗎！或者你可以上網睇咗邊間診所可以用先～
小姐:人哋話間間診所都有㗎！你呢度係咪診所呀？
Surprise！！我呢間唔係診所呀！驚喜冇？門口嗰邊，麻煩自便～
我:你係想用醫療券嘅話，去啲門口有貼醫療券字嘅診所睇呀，呢度睇嘅話就要俾現金嘅～
小姐:間間診所都用得㗎喎！你係咪新嚟㗎！懵吓懵吓乜都唔知咁，搵個話得事嘅同我講啦！
我行入醫生房:醫生，有人搵你～
醫生:我？
我:你最話得事呀嘛？有個靚女話要搵最高權威！
醫生:哦…
醫生出去後，醫生:有乜事呢？
小姐:嗰個阿姐話我阿媽張身份證唔可以當錢駛，講嚟講去都叫我去第二間診所睇！呢度唔係診所咩吓？
醫生:哦，我冇申請用醫療券，你去第二間啦
小姐:吓？
醫生擰轉面行返入醫生房，留低o咗咀嘅小姐…
小姐回神後，碌大對眼望住我:乜呀？呢度乜事呀？佢話得事㗎啦？乜水呀佢？
我:醫生
小姐:痴線！阿媽走啦！唔駛錢都唔睇佢呀！
醫生聽到佢哋走咗之後，行出嚟:寶豬…
我:嗯？乜事？
醫生:你以後唔好再用「靚女」引我出嚟…
我:吓……哦…對…唔…住…
呢啲嘢好主觀嘅…
Search